Улс төрийн Боловсролын Академиас эрхлэн гаргадаг “Шинэ Толь” сэтгүүлийн энэхүү дугаарт Азийн Барометрын судалгааны (АБС) 20 жилийн ойд зориулагдан 2022 онд хэвлэгдсэн “Азийн иргэд ардчиллыг хэрхэн үздэг вэ” номонд хэвлэгдсэн эрдэм шинжилгээний өгүүллүүдийг багтаасан юм1. АБС нь улс төрийн үнэт зүйлс, ардчилал, засаглал, бүс нутгийн хөгжлийн талаарх олон нийтийн санаа бодлыг судалдаг хэрэглээний судалгааны хөтөлбөр юм. Энэхүү судалгааны төсөл нь шинжлэх ухааны хувьд найдвартай, харьцуулж болохуйц тоо баримт бий болгох, ардчиллыг судлах оюуны чадавхийг бэхжүүлэх, судалгааны үр дүнг олон нийтэд түгээх, Дэлхийн барометрын судалгааны (Global Barometer Survey) ивээл дор ардчиллын талаарх дэлхийн судалгааны хүрээг ахиулах зэрэг дөрвөн үндсэн зорилттой. Сүүлийн хорин таван жилд АБС-ны хүрээнд долоон удаа давтамжит судалгаа явуулсан бөгөөд оюуны чухал оньсогуудыг судалж, тайлбарласан олон зуун нийтлэл, ном хэвлүүлсэн. АБС нь бүс нутгийн иргэдийн дунд үргэлжилсээр буй авторитаризмыг санагалзсан сэтгэлгээнд эмпирик үндэслэлтэй хариултуудыг өгсөөр байна. Энэ нь Ази дахь улс төрийн соёл, сонгуулийн улс төр зэрэг хүчин зүйлс улс төрийн итгэлцэл дэх авлигын сөрөг нөлөөллийг бууруулж магадгүй гэсэн домгийг сарниулсаар байгааг зохиогчид онцлосон юм. Харин ч Азийн ардчилсан орнууд дахь улс төрийн авлига нь итгэлцлийг сулруулахад хүчтэй нөлөөтэй гэдгийг тэд тэмдэглэжээ. АБС нь эрэлтийн талын динамикийг системтэйгээр шинжлэх, ардчилалд хандах иргэдийн хандлагыг танин мэдэхэд чиглэсэн шинжилгээний анхдагч болсоор байна. Бодлого боловсруулагчид, хөрөнгө оруулагчид, сэтгүүлчид, судлаачид ардчилсан улс төрийн чиг баримжаа, үнэт зүйлс, хүсэл сонирхол, ардчилсан засаглалын чанарыг иргэд хэрхэн үнэлж байгаа талаар найдвартай мэдээлэл авах нь чухал байдаг. АБС-ны эрхэм зорилго нь тухайн улсын шийдвэр гаргагчид болон олон улсын болон хандивлагч байгууллагуудын бодлого боловсруулагчидад Азид оршин буй улс төрийн системийн давуу ба сул талын тухай мэдээлэл өгөхөд туслах явдал юм. АБС нь эрдэм шинжилгээний бат бөх суурийг бий болгосон бөгөөд бүс нутаг болон дэлхийн өнцөг булан бүрт олон жилийн туршид эрдмийн ажил хийж буй судлаачдын олж илрүүлсэн чухал дүгнэлтүүдийг энэхүү номонд багтаасан юм. Тус Академи АБС-г 2000 оноос эхлэн Монголд хариуцан гүйцэтгэж ирсэн бөгөөд энэ жил бид долоо дахь удаагийн давтамжит судалгааг хийж дуусгаад байна. Бидний олж авсан мэдээллийн дата тус номны бүлэг бүрт багтсан бөгөөд эрдэмтдийн гаргаж буй дүгнэлт, таамаг, дэвшүүлж буй асуултууд монголын судлаачид, эрдэмтэд, оюутнуудын эрдмийн ажилд нь тус дөхөм болно гэдэгт итгэлтэй байна. Манай сэтгүүлд нийтлэгдсэн эдгээр өгүүллийг мөн тус Академийн вэбсайтнаас уншиж болох бөгөөд англи хувилбарыг бид хамт байрлуулах болно2. “Шинэ Толь” сэтгүүлийн энэ дугаарт орсон өгүүллүүдийг АБС-ны хөтөлбөрийн зөвшөөрөлтэйгээр нийтэлсэн болно. Энэхүү дугаарыг хэвлэн гаргахад Тайванийн Ардчиллын төлөөх сан3, Нээлттэй нийгэм Форум гүн туслалцаа үзүүлсэнийг онцлон тэмдэглэе4. 1 2 3 How Asians View Democratic Legitimacy. Edited by Yun-han Chu, Yu-tzung Chang, Min-hua Huang, and Kai-Ping Huang © National Taiwan University Press 2023. ISBN 978-GPN 10 https://www.academy.edu.mn/ Taiwan Foundation for Democracy. http://www.tfd.org.tw https://forum.mn
