Улс төрийн Боловсролын Академи Тайванийн Үндэсний их сургуультай хамтран “Азийн Барометр судалгааны өгөгдөл” сэдэвт Монгол, Тайванийн эрдэмтэн, судлаачдын хамтарсан семинарыг 2026 оны 7 дугаар сарын 24-ний өдөр Улаанбаатар хотноо зохион байгууллаа.
Хамтарсан семинарын нээлтэд Улаанбаатар дахь Тайванийн Худалдаа, эдийн засгийн төлөөлөгчийн газрын зөвлөх Софи С.Х. Чанг (Sophie C.H. Chang), Улс төрийн Боловсролын Академийн УЗ-ийн дарга, доктор Д.Ганбат, Тайванийн Үндэсний их сургуулийн Улс төр судлалын профессор, Азийн Барометр судалгааны захирал Мин-Хуа Хуан (Min-Hua Huang) нар оролцож, мэндчилгээ дэвшүүлэв.
Тайванийн талаас “Улс төрийн дэглэмийн легитим байдлын үндэс ба Азийн ардчиллын хөгжлийн төлөв” сэдвээр Тайванийн Үндэсний их сургуулийн Улс төр судлалын профессор, Азийн Барометр судалгааны захирал Мин-Хуа Хуан, “Монгол дахь ардчиллын легитим байдал: Азийн Барометр судалгааны нотолгоо” сэдвээр Тайванийн Үндэсний их сургуулийн Улс төр судлалын тэнхимийн докторын дараах судлаач Глен Нг (Glen Ng), “Монгол дахь уур амьсгалын өөрчлөлтийн талаарх олон нийтийн ойлголт” сэдвээр Тайванийн Үндэсний их сургуулийн Улс төр судлалын туслах профессор, доктор Чи-Шиен Куо (Chi-Hsien Kuo) тус тус илтгэл хэлэлцүүлсэн бол монголын талаас “Эдийн засгийн хөгжил ба улс төрийн хөгжил: Монголчуудын олон нийтийн ойлголт, үнэлгээ” сэдвээр доктор Д.Ганбат, “Тоон мэдээлэл цуглуулах арга зүй: шаталсан, олон үе шатат кластер түүвэр боловсруулах туршлага” сэдвээр Сант Марал сангийн Судалгааны захирал Ц.Сэргэлэн, “Монголын улс төрийн соёлын хөгжлийн зарим асуудал” сэдвээр УТБА-ийн судлаач, доктор Ойдовын Хатанболд нар тус тус илтгэл тавьж, улсын хэмжээнд судалгаа зохион байгуулах арга туршлага, Азийн Барометр судалгааны харьцуулалт, Монгол Улсад хэрэгжүүлж буй Азийн Барометр судалгааны чанарыг сайжруулах асуудлаар нэгдсэн хэлэлцүүлэг өрнүүлэв.
Энэхүү семинарт Улс төрийн Боловсролын Академи, Үндэсний аюулгүй байдлын зөвлөлийн дэргэдэх Стратеги судалгааны хүрээлэн, Монгол Улсын их сургууль, Отгонтэнгэр их сургууль болон бусад судалгаа, шинжилгээний байгууллагын төлөөлөл оролцож, олон улсын харьцуулсан болон олон нийтийн санаа бодлын судалгааны арга зүйн мэдлэгийг өргөжүүлэх, Азийн Барометр судалгааны өгөгдлийг эрдэм шинжилгээ, бодлогын судалгаанд илүү өргөн ашиглах, Монгол, Тайванийн судлаачдын мэргэжлийн хамтын ажиллагааг бэхжүүлэх ач холбогдолтой чухал арга хэмжээ болсныг онцоллоо.
Семинараар хэлэлцүүлсэн илтгэлийг тус Академийн “Шинэ толь” сэтгүүлийн цахим хувилбараар нийтэд хүргэнэ.
